БНСУ-д хадгалагдаж буй Юань гүрний хуулийн эмхэтгэл «Чжичжэнгийн хуулийн бичиг»-ийг Монголд авчрах боломжийг ярилцлаа
Зураг (Юань гүрний сүүлчийн хаан Тогоонтөмөрийн 1362 оны зарлиг, жишээ зураг): Тогоонтөмөрийн тушаалаар бичсэн үл мэдэгдэх бичээч / Wikimedia Commons, Public domain
БНСУ-д суугаа Монгол Улсын Элчин сайд С.Сүхболд 2026 оны арваннэгдүгээр сарын 3-нд Солонгос судлалын төв хүрээлэнгийн Жансогаг сан хөмрөгт зочилж, Юань гүрний сүүлчийн хууль зүйн эмхэтгэл «Чжичжэнгийн хуулийн бичиг»-ийг Монголд авчрах боломжийн талаар санал солилцлоо.
Элчин сайд сан хөмрөгийн Ерөнхий эрхлэгч Жон Ын Жү-тэй уулзаж, дэлхийд цорын ганц биет хувь нь хадгалагдаж буй нэн ховор энэ түүхэн эх сурвалжтай танилцав. Тэд бичгийг эх орондоо авчирч, эрдэмтэн судлаачид болон олон нийтэд танилцуулах боломжийн талаар санал солилцсон байна.
Хууль цаазын бичиг
«Чжичжэнгийн хуулийн бичиг»-ийг (지정조격) Юань улсын Тогоонтөмөр хааны оны цол Чжичжэнгийн 5 дугаар он буюу 1345 оны 11 дүгээр сард эмхэтгэж дуусгаж, 1346 оноос эхлэн мөрдөж эхэлсэн. Уг баримт бичгийг Курё улсын сүүлээс мөрдөж, улмаар Жусонь улсын үед хууль эрх зүйн гарын авлага болгон өргөнөөр ашиглаж ирсэн нь Монгол, Солонгос хоёр орны олон зууны түүхэн холбоог гэрчилдэг. Энэ нь мөн Монгол судлалын чухал эх сурвалж юм.
Хэрхэн олдсон бэ
«Чжичжэнгийн хуулийн бичиг» 2003 онд Кёнжү хотын Яндун тосгоны Сун овогтын гэрээс анх олдсон. Солонгос судлалын төв хүрээлэн хуулийн эхийг сэргээн засварлаж, эх бичгийг судлан сийрүүлсэн. Үр дүнд нь 2007 онд бичгийн гэрэл зургийн эхийг сийрүүлсэн эхийн хамт хоёр боть болгон хэвлүүлсэн байна.
