Эхний 10 сард залилах гэмт хэргийн улмаас иргэдэд 531.9 тэрбум төгрөгийн хохирол учирчээ
Зураг (Банкны карт, жишээ зураг): Lotus Head from Johannesburg, Gauteng, South Africa / Wikimedia Commons, CC BY-SA 2.5
Цагдаагийн байгууллага 11 дүгээр сарын 5-ны өдөр цаг үеийн асуудлаар хэвлэлийн хурал хийж, энэ оны эхний 10 сарын байдлаар залилах гэмт хэргийн улмаас иргэдэд 531.9 тэрбум төгрөгийн хохирол учирсныг мэдэгдлээ.
Мөрдөн шалгах албаны дарга, цагдаагийн хурандаа Н.Мишигдорж эхний 10 сарын байдлаар улсын хэмжээнд нийт 54,944 гэмт хэрэг бүртгэгдсэнээс 15,628 нь залилах гэмт хэрэг байна гэв. Өөрөөр хэлбэл гурван гэмт хэрэг тутмын нэг нь залилах гэмт хэрэг юм. Бүртгэгдсэн хэргүүдээс 8,165 буюу 53.7 хувийг илрүүлж, 12,851 буюу 82.2 хувийг шийдвэрлэсэн байна.
Залилах гэмт хэргийн улмаас иргэдэд учирсан 531.9 тэрбум төгрөгийн хохирлоос 218.7 тэрбум төгрөгийг нөхөн төлүүлсэн нь ойролцоогоор 41 хувь болж байна. Мөн 10.5 тэрбум төгрөгийн нуугдмал хөрөнгийг илрүүлжээ.
Цахим орчин давамгайлж байна
Нийт залилах гэмт хэргийн 11,939 буюу 76.4 хувь нь цахим орчинд үйлдэгдсэн. Тэдгээрээс зарим хэлбэрийг дурдвал:
- бараа, үйлчилгээ захиалж залилсан: 3,798
- тээврийн хэрэгсэл, сэлбэг захиалгын: 1,447
- Телеграм: 1,367
- лайв, сугалаа, мөрийтэй тоглоом: 1,289
- зээлтэй холбоотой: 371
- валют арилжаа: 310
- хандив тусламж: 112
- ажил, сургууль: 59
- бусад: 1,126
Хэрхэн залилдаг вэ
Мөрдөн шалгах албаны дарга залилагч нар богино хугацаанд мөнгөө өсгөх гэсэн сэтгэхүйг чадамгай ашигладгийг онцолжээ. Хүмүүст итгэл төрүүлэхийн тулд эхний бараануудыг өгөөд дараагийнхаас нь залилж эхэлдэг. Эхлээд бараагаа авсан хүмүүс дараа нь танил тал, найз нөхдөө уриалснаар хохирогчдын тоо өсдөг гэнэ. Иймд иргэдийг илүү сэрэмжтэй байхыг цагдаагийн байгууллага анхаарууллаа.
