Цахим залилангаас сэргийлэх гурван энгийн зөвлөмж

Зураг (Улаанбаатар хотын төв. Жишээ зураг): Zboogie31 / Wikimedia Commons, CC BY-SA 4.0

Цахим залилан өдрөөс өдөрт нэмэгдэж буй өнөө үед иргэд өөрсдийн аюулгүй байдлаа хэрхэн хангах вэ гэдэг асуулт чухал болоод байна. Монголын Банкны Холбооны Мэдээллийн аюулгүй байдлын мэргэжлийн зөвлөлийн дэд дарга З.Ганбагана цахим залилангаас урьдчилан сэргийлэх зөвлөмжийг танилцууллаа.

1. Фэйсбүүк орчноо хянамгай ашиглах. Цахим залилагчид зар сурталчилгааг онилж, хуурамч зар харуулах эрсдэлтэй. Иймд тухайн зар албан ёсны пэйж хаягаар явж байгаа эсэхийг шалгах хэрэгтэй. Монгол Улсад үйл ажиллагаа явуулдаг ихэнх банк Фэйсбүүк хаягтаа албан ёсны цэнхэр зөв тэмдэгтэй байдаг.

2. Мессежээр ирсэн мэдээллийг шалгах. Мессежээр залилуулсан олон тохиолдол гарч байна. Ирсэн мессежийнхээ дээд хэсэгт банкны нэр байгаа эсэхийг шалгахыг мэргэжилтэн зөвлөжээ.

3. Имэйлийн лого, тэмдгийг нягтлах. Фишинг имэйлд залилуулах тохиолдол Монгол Улсад их гарч байна. Албан ёсны банкны имэйлд тухайн банкны өөрийнх нь лого, тэмдэг байх ёстой тул үүнийг сайтар нягтлах нь зүйтэй.

Эдгээр гурван энгийн зөвлөмжийг баримталбал цахим залилангаас сэргийлэх бүрэн боломжтой гэж З.Ганбагана онцолсон. Мөн картын дугаар, ПИН код, баталгаажуулах код зэрэг хувийн мэдээллээ хэнд ч, ямар ч сувгаар дамжуулахгүй байх нь банкуудын байнга сануулдаг үндсэн дүрэм юм.