«Гэрт ойрхон сургууль» хөтөлбөрийн талбайн түрээсийн үнэ УИХ-ын дэд хороонд хэлэлцэгдлээ
Зураг (жишээ зураг: Улаанбаатар дахь сургуулийн барилга): Nemuun / Wikimedia Commons, CC BY-SA 4.0
УИХ-ын Төсвийн зарлагын хяналтын дэд хорооны өнөөдрийн хуралдаанаар «Гэрт ойрхон сургууль — хамгийн сайн сургууль» арга хэмжээний талаар Боловсролын сайдын мэдээллийг сонслоо.
Боловсролын ерөнхий газрын дарга Х.Тамир «Ачаалал үүссэн тойргуудын байршлыг тогтоож, сургуулиудыг сонгож явдаг. Нийслэлийн боловсролын газрын пэйж хуудсаар нээлттэй зар явуулж, зарын дагуу 66 байршил гаргаж ирсэн. 2022 онд дундаж түрээсийн үнэ 45,000 төгрөг байсан. Зах зээлийн үнийн судалгаа, холбогдох төрийн байгууллагын ажлын хэсгийн гаргасан үр дүнгээр энэ жил 55,000 төгрөг болсон. Хэлцэл хийж 50,000 төгрөг болгон үнийг тогтоосон. Ажлын хэсгээс орж ирсэн үнэ дээр гэрээ хийдэг» гэж танилцууллаа.
Үүнтэй холбогдуулан түрээсийн сургуулиудын төлбөр хотын төвийн түрээсийн төлбөрөөс өндөр байгаа асуудал яригдав. УИХ-ын гишүүн Ө.Шижир «Боловсролын яам 2020 онд бусдаас түрээслэж байгаа нийт мөнгө 20 тэрбум төгрөг байсан бол 2027 оны төсөв дээр 64.6 тэрбум төгрөг болж нэмэгдсэн. Энэ нь «Гэрт ойрхон» сургуультай холбоотой байх гэж харж байна» гэжээ.
Тэрбээр ерөнхий боловсролын сургуулийн дундаж барилгажих хугацаа дөрвөн жил болсныг онцолсон. «Анхны төсөв өртгийн нэмэгдэл 2027 онд шилжиж орж ирж байгаа нь 150 тэрбум төгрөг. Сургууль, цэцэрлэгийг ашиглалтад оруулахгүй удаах тусам танай салбар 150 тэрбум төгрөгийг агаарт цацаад байна» гэж шүүмжилсэн байна.
Ө.Шижир Сонгинохайрхан дүүргийн 33 дугаар хороо, Тахилтын гуравдугаар гудамжинд сургуулийн нэг метр квадрат талбайг 45,000 төгрөгөөр түрээсэлж байгааг дурдав. «Гэтэл Монголбанк, Тагнуулын ерөнхий газрын яг өөдөөс харсан хотын төвийн АА зэрэглэлд байгаа барилгын нэг метр квадрат талбайг сарын 35,000 төгрөгөөр түрээсэлдэг. 1,000 метр квадрат талбайг түрээслэхэд жилийн 350 сая төгрөг болно. «Гэрт ойрхон сургууль» хөтөлбөрийн сургуулиудын нэг нь жилийн 250 сая төгрөгийн зардалтай байна. Төр хэзээ эрэмбээ зөв тогтоодог болох вэ» гэжээ.
Үүний хариуд Боловсролын сайд Л.Энх-Амгалан «Сургуулиудын түрээсийн зардал нь байршил сайтай хотын төвийн газраас өндөр болж байгаа бол шалгуулсан нь дээр. Сургуулийн газар байхгүй учраас сонголтгүй болчихсон. Тиймээс иймэрхүү нөхцөлүүд үүссээд байна» гэж хариулав.
Нэг талаас яамны төлөөлөл үнийг зах зээлийн судалгаа, хэлцэлд үндэслэн тогтоодог гэж тайлбарлаж, нөгөө талаас УИХ-ын гишүүн түрээсийн зардал хурдтай өсч, барилгын хугацаа уддаг гэж шүүмжилсэн нь тус хуралдааны гол маргаан болжээ.
