Улсын хэмжээнд 61.8 сая толгой мал өвөлжинө, бэлчээрийн даац нутгийн 50 орчим хувьд хэтэрчээ
Зураг (Монголын нутгийн адуу, малчид): Jeanne Menj / Wikimedia Commons, CC BY 2.0
Улсын хэмжээнд 195.5 мянга орчим малчин өрхийн 61.8 сая орчим толгой мал энэ өвөл өвөлжинө. УИХ-ын Байгаль орчин, хүнс, хөдөө аж ахуйн байнгын хорооны өчигдрийн хуралдаанд өвөлжилтийн бэлтгэлийн талаар Хүнс, хөдөө аж ахуй, хөнгөн үйлдвэрийн сайд Ц.Идэрбат мэдээлэл хийв.
Мал, мах бэлтгэлийн хүрээнд 10.5 сая толгой малыг эдийн засгийн эргэлтэд оруулахаар төлөвлөжээ. Өвөл, хаврын бэлчээрийн даацын судалгаагаар нийт нутгийн 50 гаруй хувьд бэлчээр хүрэлцээтэй, 50 орчим хувьд даац хэтэрсэн дүн гарсан. Улсын тусгай хэрэглээний газар, хилийн зурвас, байгалийн цогцолборт газар отроор өвөлжих хүсэлтийг otorchin.gov.mn цахим системээр хүлээн авч байгаа бөгөөд отрын нөөц бүс нутгийн бэлчээрийн даацаар 717.4 мянган хонь өвөлжүүлэх боломжтой гэв.
Өвс тэжээлийн аюулгүй нөөцөд 12.1 мянган тонн хадлан, 4.9 мянган тонн үйлдвэрийн тэжээл бэлтгэх ёстой бөгөөд хадлангийн бэлтгэл 57, тэжээлийн бэлтгэл 75 хувьтай байна. Малчин өрхүүд өөрсдөө 990.7 мянган тонн хадлан, 9.0 мянган тонн сүрэл, 22.2 мянган тонн ногоон тэжээл, 71.1 мянган тонн үйлдвэрийн тэжээл бэлтгэсэн нь тэжээлийн нэгжээр 533.9 мянган тонн болж байна.
Газар тариалангийн хувьд 2026 онд 580.4 мянган га талбайд тариалалт хийж, 10 дугаар сарын 19-ний байдлаар 303 мянган га-гаас 509.2 мянган тонн үр тариа, 12.8 мянган га-гаас 169.1 мянган тонн төмс хураажээ. Энэ жилийн ургацын баланс өндөр гарсан тул гаднаас тэжээлийн будаа авахыг зогсоож, улаан буудайн илүүдлээр хивэг, тэжээл үйлдвэрлэх чиглэлийг барина гэж сайд хэлсэн. Мөн 100 мянган тонн улаан буудай нөөцлөх асуудал хөндөгдөв.
Махны экспорт буурсан нь анхаарал татаж байна. 10 дугаар сарын 19-ний байдлаар Монгол Улс 36.7 мянган тонн мах, махан бүтээгдэхүүнийг 139.7 сая ам.доллароор экспортолсон нь өмнөх оны мөн үеэс хэмжээгээр 22.6, мөнгөн дүнгээр 29.5 хувиар буурсан. Үүнийг УИХ-ын Нээлттэй парламентын газар Ойрхи Дорнодын нөхцөл байдалтай холбоотой гэж мэдээлжээ. Гишүүд баруун бүсэд гарсан малын халдварт өвчин экспортод нөлөөлсөн эсэхийг лавласан.
Мал эмнэлгийн урьдчилан сэргийлэх ажлаар 17 нэрийн халдварт өвчнөөс 17.2 сая толгой малыг хамруулахаар төлөвлөснөөс 15.5 сая толгойд хийж, 90 хувийн гүйцэтгэлтэй байна. Шүлхийн О, SAT-1 хэвшлээс сэргийлэх намрын дархлаажуулалтад 13 аймаг, нийслэлийн 101 сумын 5.0 сая толгой мал хамрагджээ. Үхрийн арьсны чанар сайжирч, өмнө нь 100 арьснаас 30 нь тэнцдэг байсан бол одоо 93 нь тэнцдэг болсныг сайд дурдав.
