Ганцмод-Гашуунсухайт чиглэлд цуваа нэвтрүүлэх хязгаарлалтаас зэсийн баяжмалын экспорт доголдох эрсдэл үүссэн гэж «Оюу толгой» мэдэгдлээ
Зураг (Оюу толгойн уурхай): Brücke-Osteuropa / Wikimedia Commons, Public domain
Сүүлийн өдрүүдэд зэсийн баяжмалын экспорт эрс буурсан байна. Энэ талаар «Оюу толгой» компани тодруулга өгч, хилээр нэвтрэх гарцад тавигдсан хязгаарлалт тээвэр, экспортын хэвийн үйл ажиллагааг доголдуулж болзошгүй эрсдэл үүсгээд буйг мэдэгдлээ.
Компанийн мэдэгдэлд дурдсанаар 2026 оны 10 дугаар сарын 15-ны өдрөөс хойш Ганцмод боомтоос Гашуунсухайт чиглэлд хилээр буцаж нэвтрэх гарцад тодорхойгүй шалтгааны улмаас хязгаарлалт тогтоосон байна. Өмнө нь хоногт 13 цуваа нэвтрүүлдэг байсан бол одоо дөрвөн цуваагаар хязгаарлаж байгаа нь баяжмал тээвэр, экспортын хэвийн үйл ажиллагааг доголдуулж, борлуулалт саатан эдийн засгийн хохирол учруулж болзошгүй гэж «Оюу толгой» үзэж байна. Мөн компани уурхайн үйл ажиллагаагаа тасралтгүй явуулж, үйлдвэрлэлийн төлөвлөгөөний биелэлтэд онцгой анхаарч буйгаа нэмж мэдэгджээ.
Асуудлыг тодруулахаар хандахад Аж үйлдвэр, эрдэс баялгийн яам Эдийн засаг, хөгжлийн яамтай холбогдохыг зөвлөсөн. Харин Эдийн засаг, хөгжлийн яам энэ талаарх тоон мэдээллийг Сангийн яам, Аж үйлдвэр, эрдэс баялгийн яам гаргадаг тул тэдгээрээс лавлахыг хэлжээ. Сангийн яамнаас тодруулахад одоогоор хариу мэдээлэл өгөөгүй байна.
Ингээд хязгаарлалтын шалтгааныг компани «тодорхойгүй» гэж тодорхойлсон бөгөөд холбогдох яамдаас одоогоор албан ёсны тайлбар гараагүй байна.
