Монголын ноолуур, Беларусийн маалинга хосолсон бүтээгдэхүүн үйлдвэрлэх боломжийг судална
Зураг (Беларусийн Арэхаўск (Орехово) маалингын үйлдвэр, жишээ зураг): diluted88 / Wikimedia Commons, CC BY-SA 3.0
Ерөнхийлөгч У.Хүрэлсүх, Беларусийн Ерөнхийлөгч А.Лукашенко нар Минск дэх Тусгаар тогтнолын ордонд хийсэн албан ёсны хэлэлцээний дүнгээр хэвлэлд мэдээлэл хийлээ. Талууд Монголын ноос, ноолуурыг Беларусийн маалингатай хослуулан шинэ төрлийн утас, бэлэн бүтээгдэхүүн үйлдвэрлэх боломжийг эрэлхийлэхээр боллоо.
Монгол Улсын төрийн тэргүүний түвшинд Беларусь Улсад хийж буй анхны төрийн айлчлал энэ юм. Айлчлалын хүрээнд «Монгол Улс, Бүгд Найрамдах Беларусь Улсын хамтын ажиллагааг 2027–2029 онд хөгжүүлэх замын зураглал»-д гарын үсэг зурж, мөн «Найрсаг харилцаа, хамтын ажиллагааны тухай гэрээ» байгуулжээ. Хөдөө аж ахуй, хөнгөн үйлдвэр, гааль, боловсрол, эрүүл мэнд, спорт, хэвлэл мэдээлэл, харилцаа холбооны салбарт хамтран ажиллах 10 гаруй баримт бичиг нэмж байгуулсан байна.
Худалдаа, тээвэр
Талууд Монгол Улс болон Евразийн эдийн засгийн холбоо, түүний гишүүн орнуудын хоорондох худалдааны түр хэлэлцээрийн боломжийг бүрэн ашиглаж, хоёр улсын худалдааны эргэлтийг гурав дахин нэмэгдүүлэхээр тохиролцлоо. Энэ хэлэлцээр энэ оны долдугаар сард хүчин төгөлдөр болсон гэж Лукашенко хэлжээ.
Ерөнхийлөгч У.Хүрэлсүх Беларусь Улс Монголын хувьд Европын зах зээлд гарах тээвэр, логистикийн гарц, Монгол Улс Беларусийн хувьд Азийн зах зээлийн үүд хаалга болдог гэдгийг дурдаад, Брест–Улаанбаатар чиглэлийн «Монгол вектор» чингэлэг тээврийн төмөр замын маршрутыг ашиглан идэвхтэй хамтрахыг санал болгосон. Мөн газрын тосны бүтээгдэхүүний нийлүүлэлтийн талаар ярилцаж, энэ чиглэлийн хамтын ажиллагааг өргөжүүлэх нь зүйтэй гэдэгт санал нэгдсэн.
Хөдөө аж ахуй, хөнгөн үйлдвэр
Монгол Улс «Хүнсний хувьсгал» үндэсний хөдөлгөөний хүрээнд Беларусаас хөдөө аж ахуйн зориулалттай трактор, комбайн, машин механизм нийлүүлэхийг зорьж байгаа бөгөөд цаашид Монголд трактор угсрах үйлдвэр байгуулах асуудлаар ярилцсан. «Цагаан алт» үндэсний хөдөлгөөний хүрээнд ноос, ноолуурыг Беларусийн маалингатай хослуулах боломжийг судална.
Лукашенко хөнгөн үйлдвэрлэл нь шинэ бөгөөд сонирхолтой чиглэл гэж үзэж, маалинган даавуу, ноолуураар даавуу хамтран үйлдвэрлэх, мөн Беларусь Монголын хүнсний аюулгүй байдалд хувь нэмэр оруулж, хүнс боловсруулах цогцолборын барилгыг хурдасгах бэлтгэлтэй байгаагаа хэлсэн. Түүнчлэн аж үйлдвэрийн салбарт Монголын карьер болон зорчигч тээврийн хэрэгслийн хэрэгцээг хангах бэлэн байдлаа баталгаажуулсан.
Соёл, боловсрол
Монголчуудын түүх, соёлын өв «Монголын нууц товчоо»-г беларусь хэлнээ орчуулсныг талууд онцолсон. Ирэх онд дипломат харилцаа тогтоосны 35 жилийн ойн хүрээнд хоёр улсын нийслэлд соёлын өдрүүд зохион байгуулж, соёл урлаг, аялал жуулчлалын салбарт хамтарсан төсөл хэрэгжүүлэхээр санал болгожээ.
