Цэргийн насны 2,046 залууг шинжилгээнд хамруулахад 1,100 орчимд нь өвчлөл илэрчээ
Зураг (жишээ зураг: Монголын Зэвсэгт хүчний албан хаагчид): Sgt. Matthew Nedved / Wikimedia Commons, Public domain
Нийслэлийн төсвийн 1.8 тэрбум төгрөгийн хөрөнгө оруулалтаар худалдан авсан, бүрэн тоноглогдсон түргэн тусламжийн 12 автомашиныг дүүргийн Эрүүл мэндийн төв, дүүргийн нэгдсэн эмнэлэг, Нийслэлийн Түргэн тусламжийн төв, Гачуурт, Хонхор, Туул тосгоны Эрүүл мэндийн төвүүдэд хүлээлгэн өглөө. Энэ үеэр эмнэлгийн удирдлагууд хүн амд үзүүлэх тусламж үйлчилгээг шуурхай, чанартай, хүртээмжтэй болгоход хөрөнгө оруулалтыг чиглүүлэх шаардлагатайг онцолсон байна.
Цэргийн насны залуучуудын эрүүл мэнд
Сонгинохайрхан дүүргийн Эрүүл мэндийн төвийн дарга Ч.Өнөрсайхан «Идэр чийрэг монгол цэрэг» төслийн хүрээнд цэргийн насны залуучуудыг эрүүл мэндийн урьдчилан сэргийлэх үзлэг, шинжилгээнд хамруулсан гэж ярьсан. Өмнөх жилүүдэд зөвхөн цэрэгт тэнцсэн хүмүүст шинжилгээ хийдэг байсан бол энэ жил цэрэг татлагад хамрагдсан хүн бүрд хийжээ. Биохими, цусны шинжилгээ зэрэг 50 гаруй төрлийн шинжилгээ, оношилгоо хийсэн байна.
Нийт 2,046 залуугаас 50 гаруй хувь буюу 1,100 залууд өвчлөл илэрсэн гэж тэрбээр хэлэв. Иймд цэрэгт татлагад хамрагдаж буй залуусыг эрүүл болгох, эрүүл мэндийн даатгалд хамруулах нь чухал гэсэн байр сууриа илэрхийлсэн. Тэрбээр мөн шүдний өвчлөл бүх эрхтэн системд нөлөөлдөг, жилээс жилд ихсэж байгааг дурдаж, энэ асуудалд бодлогоор анхаарахыг хүссэн аж. Мөн зорилтот бүлэг болон 6 сараас 6 настай хүүхдийг томуугийн эсрэг дархлаажуулалтад 90 гаруй хувьтай хамруулсан гэв.
Түргэн тусламж ба хөдөөгийн эрүүл мэндийн төвүүд
Нийслэлийн Түргэн тусламжийн төвийн дарга С.Ариунболд зургаан дүүрэгт 24 цагаар түргэн тусламж үзүүлдгийг дурдаж, одоогоор 1,700-1,900 дуудлагатай байгааг, өмнөх жилийн мөн үетэй харьцуулахад дуудлагын тоо 15 орчим хувиар нэмэгдсэнийг хэлсэн. Өрхийн эрүүл мэндийн төвүүдийн ажиллах цагийг нэмэгдүүлсэн нь томуугийн дэгдэлтийн үеийн ачааллаас хуваалцаж байгаа аж.
Гачуурт тосгоны Эрүүл мэндийн төвийн дарга Б.Бат-Амгалан хоёр талдаа 150 км бартаатай замаар явж үйлчилгээ үзүүлдэг, төвд автомашины гарааш байхгүй тул 2027 оны төсөвт гарааш барих саналаа дэмжихийг хүссэн. Хонхор тосгоны төвийн дарга Ө.Өлзийпагам барилга нь 2016 онд ашиглалтад орсон ч улсын комисс хүлээж аваагүй, 10 жил зөвшөөрөлгүй барилгад ажиллаж байгааг, лаборатори, дүрс оношилгооны тоног төхөөрөмж шаардлагатайг хэлсэн. Хотын төвөөс 45 км зайд орших Туул тосгоны төвийн дарга Э.Алтнаа рентген байхгүй тул иргэд Хан-Уул дүүргийн нэгдсэн эмнэлэгт очиж үйлчлүүлдгийг, 2027 онд эмнэлгийн дээврийг шинэчлэх саналаа НЭМГ-т хүргүүлснээ мэдэгдсэн.
