11-р сарын цаг агаар: дулаан өдрүүд үргэлжилсэн ч агаарын температур огцом буурч, цочир хүйтрэх магадлалтай

Зураг (жишээ зураг: Монголын өвөл): Orgio89 / Wikimedia Commons, CC0

Цаг уур, орчны шинжилгээний газар 2026 оны 11 дүгээр сарын цаг агаарын урьдчилсан төлвийг танилцууллаа. Арваннэгдүгээр сарын эхэн болон хоёрдугаар арав хоногт харьцангуй дулаан өдрүүд үргэлжлэх боловч агаарын температур огцом буурах, цочир хүйтрэх үзэгдэл ажиглагдах магадлалтай аж.

Гол хүйтрэлт нэгдүгээр арав хоногийн дунд болон сүүл, гуравдугаар арав хоногийн дунд үеүдэд ажиглагдах төлөвтэй. 11 дүгээр сард агаарын дундаж температур ихэнх нутгаар олон жилийн дунджаас хүйтэн, хур тунадас нутгийн өмнөд хэсгээр олон жилийн дунджаас ахиу байх төлөвтэй гарчээ.

Олон жилийн дундаж ямар байдаг вэ

11 дүгээр сард агаарын температур Алтай, Хангай, Хэнтийн уулархаг нутгаар -12…-18°C, Хөвсгөлийн уулархаг нутгаар -18…-22°C, Алтайн өвөр говь болон говийн бүс нутаг, Дорнодын тал газраар -2…-8°C, бусад нутгаар -8…-12°C байдаг. Хур тунадас Хангай, Хөвсгөл, Хэнтийн уулархаг нутгаар 4-8 мм, Алтайн өвөр говь болон говийн аймгуудаар 0-2 мм, бусад нутгаар 2-4 мм цас ордог.

Бүс нутгаар

Төвийн аймгууд: дундаж температур нийт нутгаар олон жилийн дунджаас хүйтэн, хур тунадас дунджийн орчим байна. Нэгдүгээр арав хоногийн ихэнх хугацаанд, мөн хоёр болон гуравдугаар арав хоногийн дунд үеүдэд цас орж, салхи ширүүсэн цасан шуурга шуурч болзошгүй.

Баруун аймгууд: Баян-Өлгий, Ховдын ихэнх, Говь-Алтай, Баянхонгорын өмнөд хэсгээр дундаж температур олон жилийн дунджийн орчим, бусад нутгаар дунджаас хүйтэн байна. Хур тунадас Говь-Алтай, Баянхонгорын өмнөд хэсгээр дунджаас ахиу байх бөгөөд нэгдүгээр арав хоногийн эхэн, дунд үеэр ихэнх нутгаар цас орж, цасан болон шороон шуурга шуурч болзошгүй.

Зүүн аймгууд: Хэнтий, Дорнодын хойд хэсгээр дундаж температур дунджаас хүйтэн, хур тунадас Сүхбаатарын өмнөд хэсгээр дунджаас ахиу байна.

Говийн аймгууд: Өмнөговийн ихэнх нутгаар дундаж температур дунджаас дулаан, Өмнөговийн баруун хэсгээр хур тунадас дунджаас бага байна.

Цаг уурынхан малчдад хадлан тэжээл бэлтгэх, малын хашаа хороо болон өвөлжилтийн бэлтгэлээ хангахыг, иргэд, аж ахуйн нэгж, байгууллагад богино хугацааны цаг агаарын нарийвчилсан урьдчилсан мэдээ, сэрэмжлүүлгийг тогтмол авч ашиглахыг зөвлөжээ.