АНУ-ын газрын тосны хоригт орсон Куба нарны эрчим хүч рүү эргэж, 144 нарны парк барьжээ
Зураг: Кубад суурилуулсан нарны цахилгаан станц. UnifiedFunctionality / Wikimedia Commons, CC BY-SA 4.0
Энэ оны эхнээс түлшний хомсдол, цахилгааны тасалдалтай нүүр тулсан Куба сэргээгдэх эрчим хүч рүү шилжих төлөвлөгөөгөө эрчимжүүлж байна. Тус улсын Эрчим хүч, уул уурхайн сайд Висенте де ла О Леви Reuters агентлагт өгсөн ярилцлагадаа АНУ-ын хориг тэднийг дотоодын эх үүсвэр хайхад хүргэсэн гэж хэллээ.
Сүүлийн жилүүдэд 144 нарны парк
Сайдын хэлснээр Кубад сүүлийн жилүүдэд нийт 1,418 мегаватт орчим хүчин чадалтай 144 нарны парк суурилуулжээ. Нар, салхи, далайн түрлэг, мөн өөрийн худгийн газрын тос, хий гээд байгаа нөөцөө бүрэн ашиглах нь зорилго аж. Нарны хавтанг хамгийн их нийлүүлдэг нь Хятад бөгөөд оны эхнээс тээвэрлэлт нэмэгджээ.
Олон улсын эрчим хүчний агентлагийн мэдээгээр Кубын цахилгааны 40 орчим хувийг дотоодын газрын тосоор үйлдвэрлэдэг. 2023 оны байдлаар сэргээгдэх эрчим хүч нийт хэрэглээний 9 хувийг л хангаж байсан. Цахилгааны сүлжээ нь хуучирсан, чулуужсан түлшнээс ихээхэн хамааралтай гэж үздэг.
Хориг хэрхэн эхэлсэн бэ?
Ерөнхийлөгч Дональд Трамп энэ оны 1 дүгээр сарын эхээр Кубын ойрын холбоотон Венесуэлээс газрын тос тээвэрлэхийг зогсоож, улмаар Куба руу нефть экспортолсон аливаа улсад өндөр татвар ногдуулахаа зарласан. Тэрээр Кубын засгийн газрыг АНУ-ын үндэсний аюулгүй байдалд заналхийлэл гэж нэрлэсэн. Түүнээс хойш Гавана руу Оросын ганцхан танкер очжээ. АНУ хувийн хэвшилд түлш нийлүүлэхийг зөвшөөрч байгаа ч төрийн өмчит салбарт экспортыг ихэвчлэн хориглосон.
10 дугаар сарын 7-нд АНУ-ын эрх баригчид Куба руу хууль бусаар гаргах гэж байсан 2.8 сая ам.доллар гаруй үнийн дүнтэй 90 ачаа биодизель хураан авснаа мэдэгдсэн. Харин Кубын сайд эдгээр ачаа засгийн газартай холбоогүй гэж няцааж, хувийн компаниудаар орж ирж буй АНУ-ын түлш хэрэгцээний 3 хүрэхгүй хувийг л хангадаг гэлээ.
Иргэдэд хүнд байна
Сайд хүндрэлээ нуусангүй: удаан хугацааны цахилгаан тасалдал, хоол хийх, тээврийн түлшний хомсдол үргэлжилж байна. Эм, ус, шатахууны хомсдол Кубыг хүмүүнлэгийн хямрал руу түлхэж байна. НҮБ болон хүний эрхийн байгууллагууд хоригийг олон улсын эрх зүйн зөрчил гэж шүүмжилдэг бол АНУ хууль бус экспортыг таслан зогсоож байна гэж тайлбарладаг.
Эх сурвалж: Al Jazeera (Reuters, AP)
