Киану Ривзийн самурай анимэйшн «Хидари» шинэ түнш хайж байна: Америкийн компанитай хэлэлцээ гацжээ
Зураг (Жүжигчин Киану Ривз, 2019 он): Governo do Estado de São Paulo / Wikimedia Commons, CC BY 2.0
Киану Ривзийн гол дүрд нь дуу оруулах японы стоп-моушн самурай кино «Хидари» (Hidari) шинэ санхүүжүүлэгч хайж байна. Киног бүтээж буй Японы Dwarf Studios Америкийн нэгэн компанитай хийж байсан хэлэлцээ гацсан тул өөр түнш эрж эхэлжээ.
Энэ тухай продюсер Норико Мацумото Өмнөд Солонгосын Бусаны олон улсын кино наадмын хүрээнд болж буй Азийн контент ба киноны зах зээл (ACFM) дээр ярьжээ. Түүний хэлснээр, Америкийн компани киноны төсвийг бүхэлд нь даахыг санал болгосон ч хариуд нь бүх эрхийг өөртөө авахыг шаардсан байна. Тал талын байр суурь нийцээгүй тул яриа хэлэлцээ урагшлахгүй байгаа аж.
«Хидари»-гийн түүх Эдогийн үеийн Японы домогт мужаан Жингоро Хидаригийн тухай домгоос сэдэвлэжээ. Киноны баатар Эдо шилтгээнийг нууцаар сэргээн босгох ажилтай холбоотой урвалтын улмаас эцэг мэт хайртай хүн, сүйт бүсгүй, баруун гараа алддаг. Тэгээд өөрөө зохион бүтээсэн механик хиймэл гарууд болон модоор сийлсэн хамтрагч «Унтаж буй муур»-тайгаа өшөө авахаар хөдөлнө. Японд Нико хотын Тошогу сүмийн алдарт «Унтаж буй муур» сийлбэрийг Хидари Жингорогийн бүтээл гэж ярьдаг.
Киноны найруулагч Масаши Кавамура анх уг санаагаа богино хэмжээний туршилтын кино болгон YouTube-д тавьсан нь 5 сая орчим үзэлт авч олны анхаарлыг татсан юм. Бүрэн хэмжээний киноны тухай энэ оны тавдугаар сард Каннын кино зах зээл дээр зарлаж, Ривз гол дүр болох Жингорогийн дуу хоолойг оруулахаар болсон нь «Жон Уик», «Матриц»-ын фенүүдийг ихэд сонирхуулсан. Төслийг Dwarf Studios, Токиогийн бүтээлч агентлаг Whatever, анимэйшн студи TECARAT хамтран бүтээж байгаа бөгөөд Questry компанийн Томонобу Ибэ санхүүжилтэд нь оролцож байна.
Одоогоор киноны нээлтийн огноо, түгээгч тодорхойгүй хэвээр. Ганц кадр бүрийг гараар хөдөлгөж авдаг стоп-моушн техник маш их цаг, хөрөнгө шаарддаг тул шинэ түнш хэзээ олдох нь төслийн хувь заяаг шийдэх нь ойлгомжтой.
Эх сурвалж: Dark Horizons (Variety-д тулгуурласан), The Playlist
