Чихрийн оронд «чихэрлэг уураг»: Бразеинтэй зайрмаг цусан дахь сахарын огцом өсөлтийг бууруулжээ

Зураг: Убли (Pentadiplandra brazzeana) ургамал. SKG713 / Wikimedia Commons, CC BY-SA 4.0

Африкийн нэгэн ургамлаас гаралтай чихэрлэг уураг чихрийн өөр хувилбар болж магадгүйг шинэ судалгаа харууллаа. Бразеин хэмээх энэ уургаар амталсан зайрмаг идсэний дараа цусан дахь сахар энгийн чихэртэй зайрмагийг бодвол бага өсчээ.

Бразеин гэж юу вэ?

Бразеин бол Баруун Африкт ургадаг убли (Pentadiplandra brazzeana) ургамлаас анх илрүүлсэн байгалийн уураг. Маш хүчтэй чихэрлэг амттай гэдгээрээ алдартай бөгөөд одоо голчлон исгэх аргаар үйлдвэрлэж байна.

Судалгааг хэрхэн хийв?

Судалгааг Оросын Хоол тэжээл, биотехнологи, хүнсний аюулгүй байдлын холбооны судалгааны төвийн эрдэмтэд хийж, Clinical Nutrition ESPEN сэтгүүлд нийтэлжээ. Элгэнд өөх хуримтлагддаг өвчин (MASLD)-тэй 101 насанд хүрэгч оролцсон. Энэ өвчин ихэвчлэн чихрийн шижин, таргалалттай холбоотой байдаг.

Оролцогч бүр гурван өөр өдөр 100 граммын ваниль зайрмаг идсэн: нэг өдөр чихэртэйг, нөгөө өдөр бразеинтэйг, гурав дахь өдөр нь бразеин дээр инулин хэмээх эслэг нэмснийг.

Үр дүнд бразеинтэй хоёр хувилбарын дараа цусан дахь сахарын огцом өсөлт чихэртэйгээс бага гарсан. Ялангуяа 2-р хэлбэрийн чихрийн шижинтэй хүмүүст ялгаа илүү тод ажиглагджээ.

Яаран дүгнэхэд эрт

Судлаачид өөрсдөө ч урт хугацааны судалгаа шаардлагатайг онцолсон. Чихэрлэг амттанаа бразеинтэйгээр сольсноор бодисын солилцоо, элэг, гэдэсний бичил биетэн, зан үйлд удаан хугацааны ашиг өгөх эсэх нь одоогоор тодорхойгүй.

Чихэр болон чихэр орлуулагчийн эрүүл мэндэд үзүүлэх нөлөө маргаантай сэдэв хэвээр байна. Дэлхийн эрүүл мэндийн байгууллага 2023 онд жин хасах зорилгоор чихэр бус амтлагч хэрэглэхгүй байхыг зөвлөж, удаан хугацаанд хэрэглэвэл 2-р хэлбэрийн чихрийн шижин, зүрх судасны өвчний эрсдэл нэмэгдэж болзошгүйг анхааруулж байсан.

Тиймээс бразеин ирээдүйтэй ч «эрүүл чихэр» гэж дүгнэхэд одоохондоо эрт байна.

Эх сурвалж: Al Jazeera