Монголбанкны 6.9 их наяд төгрөгийн хуримтлагдсан алдагдлыг шийдэх саналыг Засгийн газар дэмжлээ

Монгол төгрөгийн мөнгөн дэвсгэрт

Зураг (Монгол төгрөгийн мөнгөн дэвсгэрт): Cnanie / Wikimedia Commons, CC BY-SA 4.0

Ерөнхий сайд Н.Учрал 11 дүгээр сарын 16-нд Монголбанкны 2027 оны мөнгөний бодлогын үндсэн чиглэлийн төслийг хэлэлцлээ. Уулзалтад Сангийн сайд З.Мэндсайхан, Эдийн засаг, хөгжлийн сайд Ж.Энхбаяр, Монголбанкны Ерөнхийлөгч С.Наранцогт, УИХ-ын гишүүн Б.Заяабал нар оролцсон.

Макро үзүүлэлтээр 10 дугаар сарын байдлаар инфляц 13.4 хувь, эдийн засгийн өсөлт 7.6 хувь байна. Харин өрхийн бодит орлого 4.8 хувиар буурчээ. Сүүлийн 15 жилд инфляц Монголбанкны зорилтот түвшинд ердөө таван жил хүрсэн гэдгийг мөн дурдлаа.

Төв банкны үнэт цаасны үлдэгдэл 15.5 их наяд төгрөг, 2012–2025 оны хуримтлагдсан алдагдал 6.9 их наяд төгрөг, өөрийн хөрөнгийн дутагдал 4.8 их наяд төгрөг байна. 2012 оноос хойш төсвийн шинжтэй санхүүжилтээр нийт 15.8 их наяд төгрөг олгосон бөгөөд үүний 15.7 их наядыг 2012–2016 онд зарцуулсан. Үүнд үнэ тогтворжуулах, ипотек, "Сайн" хөтөлбөр, Эрдэнэс Тавантолгойн бондын санхүүжилт зэрэг багтжээ.

Шийдлийн санал: жил бүр 1.5 их наяд төгрөгийн Засгийн газрын тусгай үнэт цаас гаргах, хугацаа нь 25 жил, эхний таван жилд үндсэн төлбөр болон хүүгийн төлбөрөөс чөлөөлөх. Ингэснээр 2027–2031 онд улсын төсөвт шууд зардал гарахгүй гэж тооцсон байна. Арга хэмжээ хэрэгжихгүй бол 2032 оноос инфляцын нөлөөгөөр төсвийн урсгал зардал жилд дунджаар 1.3 их наядаар нэмэгдэх, хэрэгжвэл жилд 0.5 орчим их наяд төгрөгийн зардал гарна гэж тооцжээ.

Мөн Монголбанк валютын зах зээлд оролцоогоо аажмаар багасгаж, зохицуулагчийн үүрэгт шилжих, төв банкаар дамжуулан төсвийн шинжтэй үйл ажиллагаа явуулахыг хуулиар хориглох санал гарсан. Ерөнхий сайд саналыг дэмжиж, төсвийн алдагдлыг ДНБ-ий 2 хувиас хэтрүүлэхгүй дүрмийг чанд мөрдөнө гэдгээ мэдэгдлээ.

Хуваалцах:

Сэтгэгдэл нэмэх

reload, if the code cannot be seen