“Hulegu Pictures”, “Favway”-ийн хамтын бүтээл "Хүлээх өрөө" уран сайхны кино 01-р сарын 24-нд нээлтээ хийх гэж байна.

Тодруулбал, “Favway” уран бүтээлийн нэгдлийн жүжигчид болох Ж.Номингэрэл, С.Номин-Эрдэнэ, Ү.Ундрал, Б.Номин-Эрдэнэ нар зохиолыг нь бичиж, гол дүр болон туслах дүрүүдэд тоглосон анхны бүрэн хэмжээний уран сайхны кино болж буйгаараа онцлог юм.

Мөн ерөнхий найруулагчаар бидний мэдэх “Зүрхэнд гэрэлтэх од”, ”Содура” зэрэг кинонуудыг найруулсан Б.Жаргалсайхан ажилласан бөгөөд гол дүрд Ж.Номингэрэл, Х.Сумъяадорж, Б.Номин-Эрдэнэ нар тогложээ. Харин дүрүүдэд МУГЖ Б.Баатархүү, МУСТА А.Гэрэлцэцэг, МУСТА Г.Алтаншагай, Жүжигчин Ү.Ундрал нар тоглосон байна.

Энэхүү кино хайр дурлал, амьдралын утга учир, гуниг харуусал, баяр баясгалан, ухаарал, эргэцүүллийг мэдрүүлэх бөгөөд 01 сарын 24-с эхлэн Бүх кино театруудаас хүлээн авч үзээрэй.

Олон Улсын Урлаг боловсролын хөгжлийн “Гэрэлт ертөнц” академи “Дэлхийн соёл Монгол хүүхдэд” төслийнхөө хүрээнд “Цөмөөч ханхүү ба хулганын хаан” балет наадмыг хоёр дахь жилдээ энэ сард зохион байгуулж байна. ОХУ-ын балетын жүжигчдийн хамт 12 дугаар сарын 28. 29-ний өдөр Соёлын төв өргөөнд тоглох тус балетын тоглолтын үнэ 33 000-55 000 төгрөг.

Дэлхийн аль ч улс оронд шинэ жилийн баяраар хүүхэд багачууд, томчуудад урлагийн гайхамшгийг мэдрүүлэн шидэт ертөнцөөр аялуулдаг сонгодог урлагийн тоглолтыг илүү олон хүүхэд багачууд, томчуудад хүргэхийн тулд олон шинэ шийдэлтэй зохион байгуулж байгаагаа “Гэрэлт ертөнц” академийн тэргүүн, балетчин Ч.Батгэрэл танилцууллаа.

Тэрээр “Бид хүүхдүүдэд зөвхөн тоглолт үзээд зогсохгүй тайзан дээр шидэт үлгэрийнa дүр бүтээх үүд хаалгыг нээдгээрээ онцлог. Манай сургалтыг ОХУ-д балетийн мэргэжил эзэмшсэн, хайр татсан олон дүр бүтээж амилуулсан багш нар эрхлэн явуулдаг. Бидний хувьд илүү олон хүүхдийг тоглолтдоо хамруулж балетын урлагаар хичээллэх боломжийг олгохыг зорьж байна. Тиймээс “Цөмөөч ханхүү ба хулганын хаан” балетдаа цасан ширхэгийн бяцхан охидоос эхлээд Орос, Хятад, Испани үндэстний хүүхэлдэй гээд олон дүрүүдийг нэмж дэглэж байна. Эцэг эхчүүд энэ хотын түгжээнд хүүхдүүдээ хичээл сургалт таслуулахгүй зөөж хамруулж байгаад үнэхээр их талархаж байна. Сургалтад хамрагдсан хүүхдүүд балетын урлагт улам бүр догдолж дурладаг. Тиймээс бид хүүхдүүдээ уйгагүй зөөж байгаа ээжүүддээ бэлэг барихаар 19 зууны хатагтайн дүрд бүжиглэх санал тавьсан. Эцэг эхчүүд маш баяртай хүлээн авч ордны бүжгийн сургалтад хамрагдан хүүхдүүдтэйгээ хамтран тайзнаа бүжиглэж байна. Ер нь бидний тоглолт гэр бүлээрээ цугласан баярт мөчүүд болж өрнөдөг. Монгол хүүхдүүд энэ сонгодог урлагийн бүтээлийг үзээд зогсохгүй суралцаж, жүжигт оролцон тоглосноороо олон талаараа хөгждөг” гэлээ.

“Гэрэлт ертөнц” академи нь сонгодог урлагаар дамжуулан үндэсний бахархлыг бий болгохын зэрэгцээ өв тэгш үндэсний ухамсарт эх оронч монгол хүнийг төлөвшүүлэхэд хувь нэмэр оруулах зорилготой “Дэлхийн соёл Монгол хүүхдэд” төслийг санаачилжээ.

Самар цөмөгч модон цэргүүд Маша охиныг аврахын тулд хулганын хаан ба түүний цэргүүдтэй хэрхэн тулалдан тэмцэж байгааг өгүүлдэг “Цөмөөч ханхүү ба хулганын хаан” балетийг хүүхэд багачуудтайгаа үзэж урлагийн гайхамшгийг мэдрэн мартагдашгүй дурсамж бүтээхийг урьж байна.

“Цөмөөч ханхүү ба хулганы хаан” балет Монголын үйлдвэрчний эвлэлийн соёлын төв өргөөнд энэ сарын 28. 29-ны өдөр 13.00, 18.00 цагаас тус тус болно. Тоглолтын тасалбар TICKET.MN сайтаар борлуулж байна.